خلال التحقيقات في قضية خطف وسرقة رجل الأعمال سمير ريان صاحب معارض سمير ريان للسيارات، تم كشف التفاصيل الكاملة لمحاولة خطفه وحكاية الشاب أسهم في إنقاذه من قبضة خاطفيه خلال سيره بسيارة في منشأة ناصر بالقاهرة.
التحقيقات في قضية خطف رجل الأعمال سمير ريان
وينص التحقيقات الكامل في قضية الخطف والتعدي على رجل الأعمال سمير ريان، والتي حملت رقم 5203 لسنة 2023 جنح منشأة ناصر رقم حصر 372 لسنة 2023.
وروى رجال الأعمال سمير أمام جهات التحقيق تفاصيل الواقعة قائلا: اللي حصل إني كنت خلصت شغل في المعرض بتاعي ومروح عادي وواخد طريق الأوتوستراد علشان أروح كوبري جيهان السادات في اتجاهي للتجمع الخامس وأنا ما بين طلوعي من الشركة لحد ما أوصل جيهان السادات مباخدش خمس دقائق، وبعدين وأنا ماشي بعربيتي كنت خلصت طريق الأوتوستراد وطالع الكوبري اللي بينزلني على محور جيهان السادات.
أقوال رجل الأعمال سمير ريان في التحقيقات
وأقر رجل الأعمال سمير ريان أمام جهات التحقيق: الطريق كان زحمة شوية لحد ما دخلت عند المقابر علشان أطلع الكوبري فهديت بالعربية علشان طلعة الكوبري على اليمين وأنا بكون ماشي على الشمال فعلشان اتفادى اللي جاي بسرعة واللي طالع الكوبري معايا، فلقيت ميكروباص تمناية لونه أبيض راكن على اليمين و3 نازلين منه بسرعة وجايين عليا وأنا كنت هديت خالص جنب الميكروباص ده بالظبط، وفجأة واحد منهم فتح باب العربية اليمين علشان يجبروني متحركش بعربيتي والاتنين التانين لفوا فتحوا بابي أنا وفجأة راح الاتنين دول منزلني من العربية وشدوني جامد رموني في الشارع.
التعدي على سمير ريان وخطفه بسيارة
وأكمل رجل الاعمال سمير ريان، أن المتهم الثالث اللي كان فتح الباب اليمين لف هو كمان وجه وأنا كل ده قاعد أقولهم في أيه في أيه؟ عايزين أيه؟ براحة لقتهم نزلوا شتيمة فيا وقالولي بس يابن “……” منسمعش صوتك ونزلوا ضرب فيا في جسمي كله بإیدهم ورجليهم وأنا فضلت أصرخ في الشارع وأصوت وفجأة راح اتنين منهم شايلني ورموني في العربية بعد محاولة مني إني مدخلش العربية وفضلت أقاومهم بس معرفتش، وحطوني من وره على الكنبة وفضلوا كاتمين نفسي علشان متكلمش بس بتنفس عادي يعني بيحطوا إيدي على بوقي كل ما أحاول أصوت والتالت ساق العربية وراح لافف بيها ماشي عكس في المقابر تاني علشان يروح اتجاه الأوتوستراد تاني.
نص التحقيقات مع سمير ريان بواقعة خطف
وأضاف: مخدتش بالي كان في حد ساعتها ولا لأ بس المقابر بتبقى فاضية بليل وبعدين أنا أغمي عليا بعدها في العربية من الخضة والخوف وبعدين اللي اتحكالي لما فوقت إن فيه واحد كان راكن قبل مطلع الكوبري اللي بيودي جيهان السادات، شاف الواقعة من أولها وراح واخد عربیته وطالع ورا الناس اللي سايقين بيا عربيتي ومعرفش كانوا واخدني على فين، بس الشاهد قالي إنهم كانوا رايحين اتجاه القلعة على طريق الأوتوستراد واتجاه المنشية، وفضل يزعق في الشارع ويقول الحقوا العربية اللي قدامي دي مخطوف فيها واحد، لحد ما واحد سائق موتوسيكل زنق عليهم وكانت الدنيا بدأت تزحم فهما هدوا بالعربية لوحدهم
وبدأت العربيات في الشارع تزنق عليهم لحد ما وقفوا وسابوني في العربية قبل طلعة الكوبري اللي بيودي على الأباجية ونزلوا من العربية والشاهد ده قالي إنه أول ما نزل من العربية لقى واحد منهم مطلع طبنجة من جنبه فهو والناس خافوا وسابوهم يجروا وهما نزلوا من تحت الكوبري نطوا سور كده والناس خافت تجري وراهم وأنا الناس فوقتني وصحيت لقيت موبايلي موجود وحاجتي كلها والناس فضلت تطمن عليا وبعدها كلمت واحد اسمه حسن شغال معايا في المعرض وحكتله اللي حصل وجالي على طول وبعدين مكنتش عايز أعمل محضر بس قالي لأ لازم نعمل، وطلعت على القسم وكلمت رئيس المباحث قبل ما أروح وقالي تعالى القسم وروحت وحكيت كل اللي شاف كل ده وحكالي اللي حصل موجود واسمه شادي بس معايا رقم موبایله وهو مستعد يشهد وده كل اللي حصل.
خطف سمير ريان صاحب معارض أوتو سمير ريان
وكان قسم شرطة منشأة ناصر بمديرية أمن القاهرة تلقى بلاغا من رجل الأعمال سمير ريان، مقيم بدائرة قسم شرطة التجمع الخامس، بأنه حال سيره بالسيارة “ملكه” في دائرة القسم فوجئ بسيارة “ميكروباص” يستقلها مجهولون، أوقفوه واستقلوا السيارة صحبته وتوجهوا به إلى طريق الأوتوستراد، ولدى استغاثته بالمارة تركوا السيارة ولاذوا بالفرار.
ونجحت مباحث القاهرة بعد جمع المعلومات ومن خلال التعامل الفني في تحديد مرتكبي الواقعة، وتبين أنهم 6 أشخاص أحدهم يعمل طرف المجني عليه، ولـ3 منهم معلومات جنائية، وتم اتخاذ الإجراءات القانونية، وتولت النيابة العامة التحقيق.
